Li pindou - En wallon- Pus macâbe vos èstoz mwart

Pus macâbe vos èstoz mwart
D'après une histoire vraie

Dji m'vi va raconter one afêre ki vos aloz prinde po one fâve (inventée), mès portant c'est la vérité.
Tos lès vîs strouks di mon nos-ôtes k'ont lès min.mès an.nées k'mi (le même âge) l'ont ol tièsse dipûs passé sî creûs (60 ans).
*
C'è-st on vî djône ome d'on viyadje (village) ki tèlèfone â docteûr. Di ç'tins la i gn'aveût rin k'on tèlèfone dins lès viyadjes, dins on cafè ou â magazin (l'èpiç'rîe).

"Vos vouroz bin passer ol mâhon après djournée, docteûr, dji m'a twardou l'pîd, dji n'sé pus roter, èt djèydée ki dja dandji d'one bone pomâde".
*
Li nut èsteût toumée, gn'aveût co pont d'loumîre su lès voyes dès p'tits viyadjes ki n'éstint nin co min.me avou do macadam.
Li docteûr intère ol mâhon. Lès docteûrs ni bouchèt jamès a l'uche.
*

Ol mâhon, pont d'loumîre.
Siya, come one boujîe ki loum'téve ol tchambe.
Li tchambe, li bèle tchambe, c'èsteût one plèce ad.dé l'cuhine avou dès bês meûbes doû sk'on n'mèteû jamès lès pîds.
Li docteûr drouvère l'uche.
Nos't ome s'aveût pindou â plafond.
Fris' rasé (fraîchement), on costume on pô streût mès chic come on milôr, drovi po lèy vèye dès burtales (bretelles) di cûr di lucse (luxe).
Dizo l'pindou, i gnaveût on grand noû stâré linçoû (nouveau drap de lit étalé) su l'tâve a ralondjes (sur la table à rallonges), li plantche prète a-z-i stinde (étendre) li mwart (on disait "Untel èst su l' plantche" - la planche- pendant les deux ou trois jours dans la mortuaire, le temps de fabriquer le cercueil).
One pitite tâfe â pîd dil plantche, avou dès boujîes pikées dins deûs candélâbes; one èsteût aloumée, ki l'mâloureûs aveût èdoumée (entamée) jusse divant s'jèsse di désèspwar (son acte de désespoir).
Èt on cruç'fis di djène keûve (de cuivre jaune) di Dinand, tot blinkant d'aveûr sitou piyeûs'mint rinètchi.
Èt on bol avou one ramiète di pâkîs (brindille de buis) trimpée dins dol bénite èwe (eau bénite).
Èt su l'platê di stin (plateau d'étain) po lès condolèyances, nost' ome aveût mètou lès sous po payi l'visite â docteûr.

Ki l'bon Dju aye si âme.

René Dislaire  © Houffalize, le 19.10.2023